Antonio Mercero - Museo birtuala

Autobiografiatik asko duen obra da La Noche del Licenciado. Norbanako bakoitzak bere etorkizuna libreki erabakitzeko duen aukeraz mintzo da, familiako esanek eta gizartearen jazarpenak erabakian eduki dezaketen eraginez. Antonio Mercerok ere abokatu ala zinemagile izan hautatu behar izan zuen. Zuzenbide ikasketak egin arren, zinema munduan murgildu nahi zuela argi baitzuen. Beste testuinguru sozioekonomiko batean kokatzen den istorioa bada ere, gidoiko pertsonaiek eta zuzendariaren bizitzak antzekotasun handiak dituzte.

Protagonistaren etxean kokatzen da lehen unetik filma. Ospakizun bat dela-eta, senide guztiak mahai baten bueltan ageri dira. Etorkizuneko asmoez mintzo dira afarian zehar, bakoitzak bere erronken eta nahien berri emanez. Pailazoa izan nahi duela dio protagonistak. Inork ez du serio hartzen esandakoa, eta barre egiten hasten zaizkio. Filmaren amaieran protagonista maleta batekin etxetik alde egiten ageri da, ekipaje bakarra pailazoaren sudur gorria delarik.

Antzezleak: Ángel Picazo, Carmen de Lirio, Imanol Presa, Lola Herrera, Luisa Rodrigo, Manuel Huete, Miguel Ayones, Nadia Morales

Iraupena: 73 minutu